اوعى تقول لزوجتك كده....

اللبس ده كش مش كده

متبقاش ناصح وقال أيه عايز توضح لها ان جسمها اتغير وتخنت اكتر حاجه تقتل الست ان حد يقول لها ان جسمها اختلف عن قبل الجواز

واضح انك فى الايام الصعبه بتاعه كل شهر

متبقاش غبى وتقول الكلمه دى بالذات الستات بتتجنن لما حد يحللها نفسيا

ايه ده عندك شعره بيضا

تخيل احساسك لو حد فى الشارع قالك على فكره انت هتصلع احساس بايخ هو ده شعور الست لما تقولها انها داخله فى طور العجز

البنت دى جامده جدا

مهما كانت البنت اللى قدامك جامده أياك تقول الكلمه دى بصوت عالى الطبيعى انك تبصبص بس اللى مش طبيعى انك تقول الكلمه دى بصوت عالى

خطيبتى اللى فاتت كان عمرها ما هتعمل كده

اياك ان تقارن بين خطيبتك القديمه ومراتك المفروض انك نسيت الماضى خلاص وبتكمل حياتك يبقى ليه بترجع للماضى

صاحبتك دى غبيه

مش من الذكاء انك تطلق احكام على اصحاب مراتك احترم اصحاب مراتك زى ما بتحترم مراتك بالظبط وان شفت حد من اصحابها بيستغلها فهمها بالمنطق ومترميش اتهامات

ليه بتحبينى؟ انا مش مناسب لواحده فى جمالك

البنت بتحب الراجل الواثق من نفسه وانت بكلامك ده بتهز ثقتك فى نفسك قدامها

لو كنت بتحبينى مكنتيش تعملي كده

ما تحطش شروط لحبك اطلب اللى انت عاوزه بشكل مباشر وده هيقربك منها لانك صريح

انتى عامله زى امك بالضبط

هتدفع ثمن الكلمه دى ايام وليالى من العياط والنكد

مش عاجبنى اللى انتى لابساه ده

اكيد اللى لابساه عاجبها والا ماكنتش لبسته فاياك تشكك فى ذوقها ولو عايز تقول رايك يبقى باسلوب لطيف

انتى عملت ايه فى شعرك…. يع

الستات بتحب تجرب كل حاجه بلاش تسم بدنها بكلام وحش لان هى كمان ممكن تكون مضايقه من التجربه اللى عملتها خليك لطيف

لو مراتك سالتك شكلى عامل ازاى فى الفستان ده ما تقولش زى دبدوبه التخينه

لو مراتك كلمتك عن عيد جوازكم …. متقولش هو امتى

لو مراتك سالتك والفرحه بتنط من عينها فاكر زى النهارده حصل ايه ……… اوعى تقول لها مش فاكر حاول تخرج من الموقف بحنكه متبقاش صريح قوى كده

لو سالتك مراتك هتجيب لى ايه فى عيد ميلادى متردش عليها وتقول انا عارف هجيب لك ايه خلاص

لما مراتك تسالك ليه مجبتليش الهديه اللى قلتلك عليها ميكونش الرد اصلى نسيت

لما مراتك تقول لك يلا نخرج متردش وتقول ليه نخرج ونلبس ونتعب نفسنا احنا نقعد وانا هعمل لك فشار

انا اقدر اعمل اى حاجه احسن منك ………. الكلمه دى وحشه جدا وبتبين لها انها قد ايه ضئيله ومتعرفش تعمل حاجه من غيرك

لو مراتك قالت لك الممثله دى اموره متردش وتقول ايوه……..هتتندم قول لها مش اجمل منك يا حبيبتى

لو اكلت مع مراتك فى بيت تانى غير بتكوا اياك تشكر فى الاكل لان المفروض ان اكلها اطعم اكل فى الدنيا

لو مراتك اهدتك ميداليه حطها فى عنيك لان لو ضاعت جوزاتك هتبوظ

متحاولش تتكلم عن مامتها بطريقه وحشه حتى لو هى نفسها بتكره مامتها

لو لقيتها بتتكلم فى التليفون كتير ……….سيبها لان فواتير التليفون ارحم كتير من اللى ممكن يحصل لك والكلام اللى هتسمعه منها

لو مراتك سالتك بعد الجواز هو انا اتغيرت اياك تجاوب وتقول لها ……….ايوه ده كده غباء منك انما قول لها اتغيرنا يا حبيبتى انا بقيت وحش وانتى بقيتى احلى

لو انت شايف ان توم كروز واد سيس خلى رايك لنفسك

متقولش ابدا ان اكل مامتك وحشك …………. لان الليله دى هتقضيها عند مامتك

لو مراتك سالتك عن فستان واحده فى حفله كنتم فيها اعمل ………..عبيط وقول لها انا مشفتش حد غيرك فى الحفله ياحبيبتى

شخيرها زى صوت الموسيقى فى ودنك افتكر ده كويس قبل ما تحاول تعلق على شخيرها

ابنكم المولود حديثا هو الوحيد اللى يقدر يحدد امتى تقدروا تقعدوا قاعده حلوه مع بعض

احتفظ بتخيلاتك عن الجواز اللى فضلت تحلم بيها قبل الجواز لنفسك

أتمنى للجميع حياه زوجيه سعيده

هههههههههههه
ومين هيعمل كل دة يانوسة
نتمنى للجميع حياة سعيدة ومطمئنة

اهو
نحاول...مش هتخسر لو طبقنا حتى جزئيتين
يارب السعاده للكل

» ماذا تقول لمن جرح احساسك